Nýggja ættarliðið skal mennast

Svimjararnir eru yngri, enn teir vóru fyri nøkrum árum síðan.

Tað sigur formaðurin í Svimjisambandi Føroya, eftir at fyrsta kappingin í kappingarárinum er farin framvið.

Hetta merkir eisini, at úrslitini eru ikki eins góð.

 - Vit hava mist nógvar av teimu svimjarunum, sum vóru vaksnir, sigur Rókur í Jákupsstovu.

Hinvegin eru dyrnar til útheimin aftur opnar, og til ber at svimja í altjóða kappingum sum NM, EM og HM.

Føroyar fara at senda svimjarar til hesar ymsu kappingarnar - tí stuðul verður latin av altjóða svimjisambandinum, fyri at vísa flaggið og fyri at menna ungu svimjararnar, sum nú eru í brennideplinum.

 - Í fjør var eingin norðurlendsk meistarastevna, hon verður í desember. Í fjør var einki HM á stuttgeil, tað verður í desember, og næsta ár verða so nógvar kappingar, sigur formaðurin í svimjisambandinum.

Hann vónar, at onkur av svimjarunum fara at gera vart við seg, men viðgongur, at 2022 helst skal síggjast sum eitt uppbyggingarár.

 - Og aftaná tað eru vit vónandi har, sum vit ætla okkum at vera, sigur Rókur í Jákupsstovu.

svimjing_mynd_2.jpg