- Tíðindi, mentan og ítróttur
Plátubarrin
Næstan fjøruti ár eru millum 'Stormávaring' í 1985 og 'Tíð' í 2023, men Deiggj hevur kortini verið virkin konsertbólkur. Nýggja útgávan frá 30. november 2023 hevur eitt mildari úttrykk, enn tann í 1985. Tekstliga eru báðar djúpar, men tann nýggja er meira lýsandi enn lærandi, og lagsmíðið er mjúkari.
Henda Temaplátan er ikki sum flestu aðrar Temaplátur í Plátubarrini, tí ein temagestur sigur frá verkinum. Hann er Fróði Vestergaard, ið er tann, sum hevur skrivað mest partin av tilfarinum til 'Tíð'. Fróði heldur plátuna vera eitt bland av vísu- og fólkarokki, her teksturin telur minst helvtina.
Plátubarrin 9. mars 2024
Plátubarrin
Plátubarrin er ein undirhaldssending við tónleiki í vetrarskrá Kringvarpsins. Sendingin er eisini interaktivt útvarp, og senditíðin er leygarkvøld frá klokkan 20:00 til klokkan 2:00.
Hvør sending byrjar við eini hugleiðing, ið byggir á eygleiðing av menniskjans atferð. Síðani verður Vertsins løta send til klokkan 20:45, tá tátturin Temaplátan fer frá, eins og annað tema er á skránni stutt fyri miðnátt.
Nærum tveir triðingar av Plátubarrini eru við lurtaraynskjum, ið sendast kunnu til nummar 224000, ella sum telduboð til facebooksíðuna, Plátubarrin.
Verturin, Jákup Magnussen, byrjaði at gera tónleikasendingar fyri Útvarp Føroya í 1982, og varð útbúgvin journalistur í 1993. Plátubarrin varð ljóðsett tann 16. februar í 2013.
