Kongalig, forsetar og kardinalur fara til jarðarferðina hjá Haraldi kongi

Gestir úr fleiri londum koma til Oslo at fylgja Haraldi kongi V til gravar. Millum teirra eru kongalig, forsetar og umboð fyri pávan.

Úr Bretlandi koma William prinsur av Wales og Anne prinsessa. William prinsur umboðar bretska kongshúsið, meðan Anne prinsessa luttekur sum privatpersónur, tí hon er gumman hjá Hákuni kongi.

Fríðrikur kongur og Mary drotning úr Danmark verða eisini við. Tey skuldu eftir ætlan á statsvitjan í Belgia, men hon varð útsett. Tí hittast danska og belgiska kongaparið í staðin í Oslo. Margreta drotning skuldi eisini luttaka, men gav avboð, eftir at hon varð innløgd á sjúkrahús.

Kongalig umboð úr millum annað Svøríki, Spania, Niðurlondum, Jordan, Monako og Japan koma eisini til jarðarferðina.

Fleiri ríkisleiðarar verða við. Millum teirra eru forsetarnir úr Íslandi, Finnlandi, Týsklandi, Estlandi, Lettlandi, Litava, Póllandi, Írlandi, Albania, Slovenia og Kekkia.

Christophe Pierre kardinalur kemur vegna Leo páva, og sendiharrin hjá Vatikaninum í Noregi, Julio Murat, verður somuleiðis við.

Jarðarferðin kann síggjast í sjónvarpinum og verður eisini stroymd beinleiðis á kvf.fo.