Skjóting: Esmar og Tórur føroyameistarar

Esmar Joensen tryggjaði sær føroyameistaraheitið í OL-trap fyri aðru ferð um vikuskiftið.

 - Tað er stórt at vera føroyameistari. Serstakliga, tá tað ikki gongur, sum tú ætlar innleiðandi, men so riggar alt bara í finaluni, segði royndi skjúttin úr Byrsumúla.

Formaðurin í Skjótisambandinum vann sítt fyrsta FM-gull fyri tveimum árum síðan. Ta ferðina vann hann á Finn Ludvig í finaluni. Hesa ferð var ungi Bartal Klettheyggj næstbestur.

SÍ EISINI: Endiliga eydnaðist hjá Esmari

Tórur Fløtt tryggjaði sær meistaraheitið í OL-skeet annað árið á rað. Skjúttin úr Sunda Byrsufelag kom heldur illa frá byrjan, men tá á stóð rakti hann kortini best.

 - Áðrenn kappingin byrjaði, hevði eg vænta tað (at vunnið, blaðm.), men sum kappingin leið, bleiv eg meir og meir nervøsur, tí tað gekk ikki væl, segði Tórur Fløtt.

Við ársbyrjan setti altjóða skjótisambandið ISSF nýggjar finalureglur í gildið, og hetta er fyrstu ferð at hesar verða royndar í FM. Finalurnar eru styttar og talið á finaluplássum er økt úr seks upp í átta. 

 Seinasta FM kappingin á hesum sinni, verður komandi vikuskifti, leygardagin 5. sept. tá FM í Nordisk Trap verður í úti á Vík í Leirvík.