Síðsti kjansur at senda uppskot til Ítróttafagnaðin

Mánakvøldið 1. desember er síðsta freist at senda uppskot til Ítróttafagnaðin 2025.

 - Hetta er ein áminning til allar føroyingar, ið vilja fagna ella takka einum fólki ella felagsskapi fyri teirra arbeiði og týdning fyri føroyskan ítrótt, skrivar Ítróttasambandið.

 - Tað er ein, sum fer avstað við heiðurslønini, men royndir frá undanfarnum árum vísa okkum, at tað ger stóran mun hjá teimum, sum eru innstillað. Tað er ein viðurkenning, sum hevur stóran týdning og eggjar teimum til at halda fram við somu orku og eldhuga.

Fólk kunnu innstilla ein felagsskap, ein venjara, eina eldsál, eina sólstrálu ella eitt fólk, sum ígjøgnum áratíggju hevur tænt ítróttinum. Leiðreglur eru at finna á isf.fo.

Ítróttasamband Føroya skipar á hvørjum ári fyri Ítróttafagnaðinum, sum varpar ljós á føroysk ítróttafólk, hjálparfólk, leiðarar, venjarar, eldsálir o.o., sum á ymsan hátt virka í føroyska ítróttaheiminum, skrivar ÍSF.

Ítróttafagnaðurin 2025 er í Varpinum í Klaksvík leygarkvøldið 7. februar 2026.