Dátuábyrgdari meldaður

Dátueftirlitið viðgjørdi í fjør 55 mál um trygdarbrot.

Tað eru sjey fleiri enn í 2023.

Eitt mál var latið løgregluni við áheitan um, at dátuábyrgdarin var skuldsettur fyri at bróta dátuverndarlógina, stendur í ársfrágreiðingini hjá Dátueftirlitinum fyri 2024.

Í øllum 55 førunum í fjør boðaði dátuábyrgdarin frá um trygdarbrotini.

27 brot vóru privatum fyritøkum, 25 hjá tí almenna og fimm brot vóru hjá kommunum.

Eitt trygdarbrot ger, at persónsupplýsingar av tilvild ella ólógliga vera burturbeindar, burturmistar, broyttar, óheimilað givnar víðari, ella atgongd verður givin til persónsupplýsingar, sum eru sendar, goymdar ella á annan hátt viðgjørdar.

Teldupostar fara skeivt

Eins og í 2023 var vanligasta trygdarbrotið í fjør, at teldupostar og annað vóru sent skeivt. 

Trý mál endaðu við átalu, og átta mál vóru ikki lokað við ársenda.

Dátueftirlitið stovnaði 332 mál í fjør.

Tað eru færri enn undanfarnu fýra árini.

Í fjør vóru 143 munnligir fyrispurningar skrásettir.

Vita einki um dátuvernd

Dátuábyrgdarar og dátuviðgerarar hjá smáum fyritøkum og stovnum hava verri enn so síni viðurskifti í lagi, sigur Dátueftirlitið, sum hevði 82 eftirlitsmal í fjør.

Nógvir hava einki gjørt yvirhøvur. 

Og bara fáir høvdu øll viðurskifti í lagi.

Rættiliga nógv vita ikki, hvar tey skulu byrja við dátuverndini, sigur Dátueftirlitið í ársfrágreiðingini fyri 2024.

Dátueftirlitið fekk 37 fráboðanir um 390 vakmyndatól í fjør.