Eingin loysn enn um snarbussin í Eysturoyartunlinum

Enn er ikki funnin nøkur loysn á avbjóðingini hjá Bygdaleiðum at skula rinda fult gjald fyri hvønn buss, sum koyrir í Eysturoyartunlinum.

Men samskifti er við Tunnilsfelagið, sum vónandi endar við lægri gjaldi fyri bussarnar.

Teir kunnu tí brúka tunnilin oftari.

Tað sigur Jóhan Christiansen, landsstýrismaður, í svari til Eyðgun Samuelsen, løgtingskvinnu, sum spurdi um snarbussin millum Klaksvík og Tórshavn.

Hann sigur, at nakrar broytingar vera eftir ætlan gjørdar á leiðini millum Norðoyggjar og Suðurstreymoy, tá skúlarnir byrja aftur eftir summarfrítíðina.

Hetta er leið 401.

Eyðgun Samuelsen spurdi eisini um leið 400.

Landsstýrirmaðurin svarar, at leið 400 hevur í nógv ár verið mest nýtta farleiðin hjá Bygdaleiðum.

15 leiðir knýttar at einari

15 leiðir eru bundnar saman við koyringini hjá leið 400. 

Tí er tað ein trupul uppgáva at gera broytingar.

Ein fyritreyt fyri at gera størri broytingar á Bygdaleiðum er, at Strandfaraskip landsins fáa nýggja planleggingarskipan. 

Hendan skipan skuldi koma í vár. Men hon er seinkað.

Arbeiðið verður tikið uppaftur eftir páskir, sigur Jóhan Christiansen.