KÍ vann á HB við tíggju ímóti ellivu

Páll Klettskarð skeyt avgerandi málið í yvirtíðini, tá KÍ, sum mátti spæla við 10 ímóti 11 síðsta hálva tíman, sendi HB úr steypakappingini í 1. umfari.

Klaksvíkingar løgdu seg framum við máli frá Patriki Johannesen eftir einum korteri og høvdu fult tamarhald á í Gundadali. Fyritreytirnar hjá heimaliðnum batnaðu kortini munandi, tá Issah Ahmed Latif var útvístur tíggju minuttir inn í seinna hálvleik.

Kortini hótti HB sjáldan, meðan KÍ lá framvið við skjótum mótálopum. Ikki fyrrenn tá 81. minuttir vóru spældir, eydnaðist heimaliðnum at javna, tá Sammy Solitaire Siddharta Skytte gjørdi sær dælt av einum mistakið frá KÍ-málverjanum.

Nú var alt opið, men sjálvt um HB hevði ein mann meir, tóku teir seg longur aftur á vøllin, og tá var Páll Klettskarð klárur og avgjørdi.

Víkingur reisti seg

Víkingur hevur fingið eina vánaliga byrjan upp á FM-verjuna, men sterka steypaliðið gjørdi bart, tá høgt flúgvandi NSÍ kom á vitjan í Sarpugerði. 

Tað var kortini Aron Knudsen, sum legði útiliðið framum tíðliga. Teir ljósabláu svaraðu aftur við tveimum málum frá Poul Kallsberg og Stefani Radosavljevic, og eftir steðgin sló Jørgen Nielsen sigurin fastan.

Aðrastaðni skeyt Pætur Petersen hattrikk, tá B36 vann 3-1 á 07 Vestur á Dungasandi. AB sendi FC Suðuroy út við 1-0 heimasigri, og Skála eyðmýkti TB undir Mýruhjalla, har heimaliðið vann ikki minni enn 8-0. Martin Johansen dusaði sær við fýra málum ímóti Betri-deildarliðnum.

Mikukvøldið eru síðstu dystirnir í 1. umfari. FC Hoyvík tekur ímóti B71, og ÍF vitjar B68 á Svangaskarði.