Tveir føroyskir svimjarar til evropeisku juniormeistarastevnuna

Elisabeth Erlendsdóttir og Bartal Erlingsson Eidesgaard úr Havnar Svimjifelag taka næstu dagarnar lut á evropeisku juniormeistarastevnuni í kappsvimjing á langgeil í italska høvuðsstaðnum, Róm, skrivar heimasíðan hjá Svimjisambandi Føroya, ssf.fo.

Bartal Erlingsson Eidesgaard svimur 100m frí, 50m bringa, 200m frí og 50m frí, meðan Elisabeth Erlendsdóttir skal svimja 100m rygg, 50m rygg og 200m rygg.

Góðir 550 svimjarar úr 48 londum eru við í kappingini, sum verður í sonevnda Foro Italico, sum telist millum vakrastu svimjihylarnar í heiminum. Føroysku svimjararnir settu kós móti Italia í gjár saman við venjaranum, Panagiotis Christou.